frétt

Kæru aðstandendur

Hér gengur allt vel og heimilismenn flestir við góða heilsu. Enn hefur enginn veikst af Covid-19 og vonum við að það haldist þannig sem lengst.

Við höfum gert ýmsar ráðstafanir til að minnka líkur á smiti og er heimsóknarbannið umrædda bara einn liður í því. Mig langar þó að ítreka við ykkur að heimsóknarbannið á við um allar heimiliseiningar okkar, ekki bara á hjúkrunarheimilinu og í Bæjarási heldur líka í Ási og Ásbyrgi. Mig langar einnig að nefna við ykkur að ef þið þurfið eða viljið færa heimilismönnum eitthvað þá má koma með það, vera í sambandi við deildarstjóra og hægt er að skilja það eftir í anddyri hjúkrunarheimilis til dæmis.

Varðandi ferðir heimilismanna út af heimilinu þá getum við auðvitað ekki bannað þær. Okkur langar þó að biðja ykkur um að vinna með okkur að því að hindra í lengstu lög að smit komi inn á heimilið og reyna því eftir fremsta megni að fresta öllum slíkum ferðum.

Síðast en ekki síst vil ég segja ykkur frá því að það gæti komið til þess að við þyrftum að flytja fólk á milli herbergja og jafnvel milli húsa. Við vitum auðvitað ekkert hvað framundan er og hve margir gætu komið til með að veikjast hjá okkur. Við verðum að vera undir það búin að setja fólk í einangrun og það mun kalla á einhverja flutninga, bæði á veikum og eins þeim sem ekki eru veikir. Við vonum að þetta valdi sem minnstum óþægindum fyrir fólk og reynum auðvitað hvað við getum til þess.

Takk fyrir gott samstarf, Birna