Heilbrigðisstofnun Suðurlands og Ás, dvalar og hjúkrunarheimili  í Hveragerði hafa gert með sér samning um samtengingu við sjúkraskrárkerfið Sögu hjá HSU.  Heilbrigðistarfsmenn á Ási fá þar með aðgang að rafrænni sjúkraskrá fyrir heimilismenn í tölvukerfi HSU. Með samningnum fær Ás aðgang að sjúkraskrárkerfi heilbrigðisumdæmis Suðurlands.  Það mun spara tíma, eykur yfirsýn yfir líðan heimilismanna, gerir hjúkrunarmeðferðina markvissari og skráningu heilbrigðisgagna öruggari og ítarlegri. Gögnin verða aðgengilegri sem auðveldar upplýsingaflæði  á milli HSU og Áss. Með samningi þessum eykst gagnaöryggi ásamt því að skráning verður samræmd og skilvirkari bæði heimilismönnum í Ási og fagfólki til hagsbóta.

  

Gott samstarf er milli Heilbrigðisstofnunar Suðurlands og dvalar- og hjúkrunarheimilisins Áss og má geta að í  yfirstandandi breytingum og lokun á eldhúsi HSU á Selfossi hefur verið gengið til samninga við Ás, sem mun hlaupa undir bagga með mat fyrir sjúklinga HSU.