Í Bæjarási er Eden hugmyndafræðin höfð að leiðarljósi og til stendur með tíð og tíma að innleiða hugmyndafræðina annarsstaðar í Ási líka. En um hvað snýst þessi svokallaða Eden hugmyndafræði?

Hún snýst um að fólk haldi sjálfræði sínu og reisn þó flutt sé á hjúkrunarheimili og að heimilisfólk taki sjálfstæðar ákvarðanir um daglegt líf sitt. Hugmyndafræðin varð til í Bandaríkjunum fyrir liðlega tuttugu árum.

Þá hóf læknirinn Bill Thomas að vinna sem yfirlæknir á hjúkrunarheimili í Bandaríkjunum en hann hafði fram að því starfað á bráðadeild spítala.
Hann sinnti sínu starfi af alúð og einn daginn þegar hann var á stofugangi urðu straumhvörf í þeim hugmyndum sem hann hafði um hjúkrunarheimili. Hann settist niður hjá roskinni konu sem var rúmföst og spurði hana hvernig henni liði. Hún var lítil og fíngerð en með stór augu. Hún hikaði andartak en horfði svo beint í augu hans og sagði: Ég er fjarska einmana.

Við því átti læknirinn engin ráð og engin lyf. Orð gömlu konunnar fylgdu honum og einn daginn ákvað hann að setjast niður á setustofu öldrunarheimilisins og vera þar nokkra daga. Reyna á sjálfum sér hvernig það væri að vera heimilismaður á hjúkrunarheimili fyrir aldraða. Hann komst að því að þrennt amaði að hjá fólkinu fyrir utan alla krankleika. Þetta voru einmanaleiki, leiði og vanmáttarkennd. Bill Thomas fékk tækifæri til að stofna hjúkrunarheimili eftir þennan eftirminnilega atburð og hefur nú í tvo áratugi verið að þróa þessa hugmyndafræði sem hann nefndir Eden. Heimilin sem fylgja hugmyndafræðinni eru orðin mörg hundruð, í Bandaríkjunum, Ástralíu og víða um Evrópu.. Aðstandendur eru ávallt velkomnir og hvattir til að koma sem oftast. Aðstandendur eru hvattir til að leggja af mörkum, taka þátt í daglegu lífi og vera virkir inni á heimilinu þar sem þeirra aðstandandi býr. Í samráði við heimilismenn og aðstandendur er reynt að finna út hvaða siði og venjur fólk vill halda í þegar það flytur á Eden heimili. Svokallaðir Eden hjálparar eru börn, gæludýr og lifandi plöntur. Nú búa gæludýr í Ási, börn koma vikulega bæði frá leikskóla í nágrenni en einnig úr skólum og nú er á sumrin verið að rækta grænmeti. Allir heimilismenn geta komið með sín húsgögn í sitt herbergi, sín rúmföt ef þeir kjósa, rúmteppi, gardínur og svo framvegis. Þá leggjum við áherslu á að heimilismenn geti haft eitthvað af sínum persónulegu munum í sameiginlegu rými. Það getur oft verið gott fyrir heimilisfólk að sjá málverk í stofu sem það hefur átt í tugi ára eða fallegt borð, stól eða lampa og jafnvel getur þetta gefið því öryggiskennd á nýju heimili.

Áhugaverðar vefslóðir fyrir þá sem vilja kynna sér Eden hugmyndafræðina nánar: www.edenalt.org, www.eden-alternative.co.uk og www.edendenmark.dk